RADIOAMATORIZMI
Radioamatorizmi është një sport e njëkohësisht është edhe shërbim i rëndësishëm për komunitetin e shoqërinë si dhe hulumtim teknik e aktivitet tekniko-shkencor.
Radioamatorët trajnojnë dhe përmirësojnë njohuritë e tyre teknike në fushat e radios, elektronikës bazë dhe informatikës, rregullat dhe mënyrat e komunikimit me valë, zhvillimin e mëtejshëm të lidhjeve të miqësisë midis radioamatorëve nga të gjithë vendet e botës si dhe zhvillimin e garave të kategorive të ndryshme në ambientet e mbyllura e të hapura - të gjitha këto bëhen sigurisht edhe pa smartphones e pa internet!
Në rastin e black-out apo fatkeqësive natyrore por edhe në raste krizash të tjera, komunikimet publike apo shërbimet e tjera të telefonisë dhe/apo internetit mund të mos funksionojnë pjesërisht apo të jenë plotësisht të paralizuara duke penguar autoritetet përkatëse në komunikimin dhe dërgimin e thirrjeve të emergjencës. Në këto raste radioamatorët me pajisjet radio dhe antenat e tyre bëjnë të mundur komunikimin me stacionet e tjera radioamatore e këto pastaj me autoritetet përkatëse duke i shërbyer komunitetit e shoqërisë e duke shpëtuar kështu jetë!
Të mos harrojmë që deri në fund të shekullit të kaluar, të gjitha komunikimet në tokë, det dhe ajër bëheshin me anë të telegrafisë dhe sot gjithashtu telemetria, transmetimi i motit (satelit-tokë/det), komunikimet emergjencës, njësitë ushtarake, etj. përdorin telegrafinë për komunikim e transmetim të dhënash.
Në shtetet e bashkuara të Amerikës, njësitë MARINES janë pjesë e forcave të armatosura dhe kanë njësitë speciale që quhen “Shërbimet Radio Amatore të Marinës”. Anëtarët e këtyre njësive mësojnë, përgatiten dhe kalojnë testimin e rregullt për operator radioamator në mënyrë që të jenë në gjendje të sigurojnë komunikimet ndërlidhëse në kohë emergjencash në bashkëpunim me radioamatorët, pra radioamatorizmi në marinën e SHBA është një shërbim shumë i rëndësishëm e shembuj të tillë ka plot.
Grupimet (klubet, shoqatat, organizatat dhe federatat) e operatorëve radioamatorë organizojnë shumë gara e aktivitete të ndryshme si psh. në ARDF (Amateur Radio Direction Finding - Garat e Gjetjes së Drejtimit apo FoxHunting – Gjuetia e Dhelprës (ska të bëjë me gjuetinë e kafshëve por të pajisur me radio me kufje e antena në dorë, behet gjetja me shpejtësi, pra duke vrapuar, të transmetueseve të fshehur qëllimisht në zona kodrinore/malore/pyjore) - në kohë të trazuara këto ushtrime janë sigurisht jetike për shoqërinë dhe vendin, në garat e SOTA – Summit On The AIR apo IOTA – Islands On The Air, në Kampionatet Botërore të HF-së të organizuara nga IARU – Organizata Ndërkombëtare e Radioamatorizmit e po ashtu edhe në një ndër garat më të rëndësishme të sportit të radioamatorizmit në HSTWC – High Speed Telegraphy World Championship - Kampionatin Botëror Telegrafi Shpejtësi e Lartë.
Sporti botërisht është përcaktuar si një aktivitet që përfshin përpjekjet fizike me përdorimin e aftësive mendore në të cilën një individ apo një grupim/ekip garon me një tjetër ose kundër njëri-tjetrit për argëtim, pra edhe radioamatorizmi aq më tepër është sport dhe radio-sport me të gjitha cilësitë!
Kush është radioamatori
Radioamatori është një person që pasi ka mësuar dhe është përgatitur në temat përkatëse në fushat e elektroteknikës, informatikës, rregullat dhe ligjet në fuqi për radio-komunikimet, etj. ka arritur të kalojë me sukses provimin për operator radioamator dhe ka marrë autorizimin zyrtar (lejen e transmetimit) për të komunikuar me radio, me persona të tjerë, të cilët gjithashtu janë të autorizuar ligjërisht për të komunikuar me radio, pra me radioamatorë.
Këto komunikime bëhen sigurisht në bandat e frekuencave të caktuara me ligj, për Shqipërinë nga AKEP - Autoriteti i Komunikimeve Elektronike dhe Postare në koordinim me ITU - Unioni Ndërkombëtar i Telekomunikacionit për të gjithë botën.
AKEP-i është institucioni shtetëror zyrtar shqiptar që pas provimit për patentën e operatorit radioamator i lëshon radioamatorëve edhe shenjën e thirrjes dhe lejen e transmetimit me anë të cilës operatoret radioamatorë njihen unikisht në të gjithë vendet e botës e autorizohen të operojnë në të gjitha bandat, frekuencat e mënyrat e operimit të paracaktuara për Shqipërinë, rajonin dhe gjithë botën.
Disa mund ta mendojnë radioamatorizmin si një hobi, sepse nisen thjesht nga fjala “amator”, por ky është një përceptim tejet sipërfaqësor dhe krejtësisht i gabuar.
Fjala “amator” në radioamatorizëm ka kuptimin që shërbimi radioamator nuk bëhet në këmbim të parave apo për qëllime fitimi por tërësisht për komunitetin e shoqërinë sepse operatorët radioamatorë vullnetarisht e me përgjegjësi të plotë dhe njohuri shumë profesionale ofrojnë shërbimet e tyre për të ndihmuar në mbajtjen e komunikimeve edhe në kohët e emergjencave civile.
Federata Shqiptare e Radioamatorizmit është themeluar në vitin 1952 dhe në bashkëpunim me shoqatat dhe radio-klubet sportive të radioamatorizmit në rrethe, organizon aktivitete të ndryshme, mbështet në aftësimin e të rinjve dhe personave që dëshirojnë të merren me këtë sport dhe aktivitet tekniko-shkencor shumë interesant si dhe ndihmon në përmirësimin dhe përditësimin e njohurive të radioamatorëve anëtarë.
Disa foto nga aktivitete te ndryshme
Ekipi Kombëtar në Kampionati ballkanik High Speed Telefraphy
Operimi ne Telegrafi gjatë një kontesti
Tasto e thjeshtë telegrafie e bërë me mjete rrethanore
EME ZA5V në vitin 2018: Testim i radiove dhe antenave përpara operimit
Grupi i operimit EME (earth-moon-earth) me shenjë thirrjeje ZA5V në vitin 2018 së bashku me radioamatorët e rinj