Federata Shqiptare e Radioamatorizmit – Albanian Federation of Radio Amateurs

RADIOAMATORIZMI

Radioamatorizmi është një sport dhe njëkohësisht shërbim e aktivitet shkencor me anë të cilit jo vetëm bëhen gara të ndryshme në ambjente të mbyllura e të hapura, por edhe krijohen lidhje me radioamatorë në mbarë botën! Gjithashtu ai zhvillon njohuritë teknike në fushat e radios, elektronikës e informatikës dhe zhvillon lidhje miqësie midis radio amatorëve nga vende të ndryshme të botës - të gjitha këto bëhen sigurisht edhe pa internetin apo telefonët celularë!

Kush është radioamatori

Radioamatori është një person që ka marrë autorizimin zyrtar (lejen e transmetimit) për të komunikuar me radio, me persona të tjerë, radioamatorë, të cilët gjithashtu janë të autorizuar ligjërisht për të komunikuar me radio.

Këto komunikime bëhen sigurisht në banda e frekuenca të caktuara me ligj, për Shqipërinë nga AKEP (Autoriteti i Komunikimeve Elektronike dhe Postare) në koordinim me ITU (Unionin Ndërkombëtar të Telekomunikacionit). AKEP është institucioni që pas provimit për patentën e operatorit radioamator i lëshon radioamatorëve edhe shenjën e thirrjes dhe lejen e transmetimit me anë të cilës operatoret radioamatorë autorizohen të operojnë në të gjitha bandat, frekuencat e mënyrat e operimit të paracaktuara.

Në rastin e black-out apo fatkeqësive natyrore por edhe në raste krizash të tjera, komunikimet publike apo të shërbimeve të tjera të telefonisë e internetit mund të mos funksionojnë më apo të jenë plotësisht të paralizuara duke penguar kështu dërgimin e thirrjeve të emergjencës. Por në këto raste radioamatorët me pajisjet radio dhe antenat e tyre mund të bëjnë të mundur komunikimin me stacionet e tjera radioamatore e këto me autoritetet përkatëse duke shpëtuar kështu jetë!

Federata Shqiptare e Radioamatorizmit në bashkëpunim me shoqatat dhe radio-klubet sportive të radioamatorizmit në rrethe, ndihmon në aftësimin e personave që dëshirojnë të merren me këtë sport dhe aktivitet shumë interesant si dhe ndihmon në përmirësimin dhe përditësimin e njohurive të radioamatorëve anëtarë.