Dita Botërore e Radioamatorëve - World Amateur Radio Day

Kampionati i 7-të Kombëtar i Radioamatorizmit në “Telegrafi – Shpejtësi e Lartë” 2024

Pas një sërë shtyrjesh për mungesë fondesh të nevojshme për organizimin e aktiviteteve sportive, Federata Shqiptare e Radioamatorizmit zhvilloi më 5 dhe 6 tetor Kampionati i 7-të Kombëtar i Radioamatorizmit në “Telegrafi – Shpejtësi e Lartë” 2024.

Pas kualifikimit dhe përzgjedhjes në Klubet Sportive në rrethe, nga planifikimi fillestar me 23 sportistë radioamatorë arritën kualifikimet 20 dhe morën pjesë 13 prej tyre, të cilët përfaqësuan ekipet e Radio-Sport Burreli, Radio-Sport Kruja, RadioKlub Partizani, Radio-Sport Elbasani dhe Shoqata Kombëtare e Radioamatorizmit Shqiptar.

Gjatë kampionatit pati gara relativisht të forta, ku:

·       titullin Kampione e Vendit për Femra e fitoi znj. Elvira Shërali e ekipit të Radio-Sport Elbasani. Znj. Shërali është sportiste e shkëlqyer radioamatore elitare dhe anëtare e ekipit Kombëtar të Shqipërisë në aktivitetet ndërkombëtare. 

·       titullin Kampion i Vendit për Meshkuj e fitoi z. Kujtim Çela i ekipit të Radio-Sport Kruja, i cili gjithashtu është sportist elitar dhe anëtar i ekipit Kombëtar të Shqipërisë në aktivitetet ndërkombëtare.

Në këtë aktivitet u dalluan gjithashtu sportistët radioamatorë Armend Aliaj, Glauk Gjini dhe Rejan Laçi, të cilët u renditën përkatësisht ne vendet e parë, të dytë dhe të tretë në kategorinë B - meshkuj - para të rinj, si dhe Erta Ruçi në kategorinë  A - femra - para të rinj, të katër këta sportistë të rinj dhe anëtarë të ekipit Radio-Sport Burreli.

Në klasifikimin e përgjithshëm për femra znj. Mimoza Balliu u rendit në vendin e dytë dhe znj. Anila Shati zuri vendin e tretë, të dyja sportiste radioamatore me përvojë të gjatë dhe anëtare të ekipit Radio-Sport Elbasani. Kurse në klasifikimin e përgjithshëm për meshkuj spikatën gjithashtu dy sportistë radioamatorë me përvojë të gjatë në sportin e radioamatorizmit si z. Jorgaq Gjoni i RadioKlub Partizani, i cili u rendit në vendin e dytë si dhe Z. Fatos Demeti anëtar i Shoqatës Kombëtare të Radioamatorëve Shqiptarë, i cili zuri vendin e tretë. Rezultatet dhe certifikatat e sportistëve radioamatorë janë publikuar në faqen e internetit të FSHR-së në https://fshra.org/aktivitete_rezultate/al_hst_2024/hza_2024_index_en.html


Kupa e Shqipërisë në Radioamatorizëm “Telegrafi – Shpejtësi e Lartë” 2024

Pas një sërë shtyrjesh për mungesë fondesh të nevojshme, Federata Shqiptare e Radioamatorizmit zhvilloi më 5 dhe 6 tetor 2024 edhe aktivitetin sportiv Kupa e Shqipërisë në Radioamatorizëm” 2024.

Në këtë aktivitet sportiv u klasifikuan 20 sportistët radioamatorë, por nga mosparaqitja e 5sportistëve radioamatorë lindën keqkuptime në lidhje me regulloren e pjesëmarrjes së sportistëve në kategoritë përkatëse e për pasojë pati edhe mosmarrëveshje dhe kontestime të rezultateve ekipore. Situata u diskutua edhe me përfaqësuesit më të lartë të IARU-t gjatë Kampionatit Botëror dhe përgjigjet ishin pa ekuivoke: lëvizjet në kategori shkaktojnë alokime e për pasojë duhen patjetër përllogaritje të veçanta për rezultatet ekipore! Për arsyet e mësipërme më dt. 17.10.2024 në mbledhjen me kryetarët e klubeve pjesëmarrëse në kampionat u sqarua në detaje pika B2.13 e rregullores dhe të gjithë kryetarët e klubeve sportive radioamatore morën vendimin unanim që pamvarësisht plotësimit fillestar të kategorive me nga të paktën tre konkurrentë, për arsye të mosparaqitjes pa arsye të disa sportistëve, përllogaritja e pikëve për garën mes ekipeve, pra Kupën e Shqipërisë në Radioamatorizëm "Telegrafi - Shpejtësi e Lartë" duhet të bëhet e veçantë duke alokuar konkurrentët në kategorië e tyre origjinale sipas moshës.

Rezultatet e Kupës së Shqipërisë të Radioamatorizmit për vitin 2024 të datës 06.10.2024 u shpallën të pavlefshme dhe përllogaritja sipas rregullores tregon që:

 I.            në vendin e parë dhe me prurje të reja në katër kategori renditet ekipi Radio-Sport Burreli

meqë klubet tjera sportive ishin përfaqësuar vetëm me 1-2 kategori, pavarësisht renditjes me pikë në këtë kampionat (renditja përllogaritet nga shuma e pikëve të kategorive ku anëtarët janë alokuar sipas moshës) nuk arrijnë vlerësim për Kupa e Shqipërisë në Radioamatorizëm "Telegrafi - Shpejtësi e Lartë" 2024.

Organizimi dhe zhvillimi i këtyre aktiviteteve u bë i mundur me mbështetjen dhe financimin edhe të anëtarëve të Radio-Sport Burreli.


fshra.org Kampionati i 7-të Kombëtar dhe Kupa Shqipërisë HST2024 Burrel